Huishoudkunde op skool is waardevol

huishoudkunde op skool was waardevol

Huishoudkunde op skool was waardevol. Ek het Huishoudkunde geneem van St.7 tot en met St. 10. Dit wat ek in die Huishoudkunde klas geleer het onthou en gebruik ek steeds meer as 35 jaar later. Huishoudkunde het my geleer bak en kook en baie van die tegnieke wat ek op skool geleer het gebruik ek steeds.

Ons moes heeltyd skottelgoed was terwyl ons besig was met bak en ek doen dit steeds. Dit maak jou skoonmaak na die tyd soveel makliker.

My Ma was ’n perfeksionis en het niks daarvan gehou wanneer ons tuis iets wou bak nie, dus het die Huishoudkunde klas vir my daardie geleentheid gebied. Ek het geleer bak en kook, tafel dek, onthaal, spyskaarte en finansies uitwerk. Spyseniering. Daar was geen ekstra koste vir my Ma nie. Dinge was eenvoudig daardie tye. Niks fênsie nie. Lewensvaardighede vir meisies.

Dit het my goed te pas gekom na my troue. My man het ’n vrou getrou wat geweet het hoe om kos te maak en koek te bak.

Ek het my plek met selfvertroue in die kombuis vol gestaan en steeds pas ek toe wat ek soveel jare gelede geleer het. Dit was vir my ’n jammerte toe my meisiekinders nie dieselfde kwaliteite op skool geleer het nie. Daar was wel Huishoudkunde of Gasvryheidstudies soos dit bekend gestaan het. Die ouers moes egter ruim bydra maandeliks. Ek kon dit as enkelma nie bekostig nie. Dus het my kinders nie soos ek die basiese dinge geleer nie.

Huishoudkunde behoort weer in die skole aangebied te word op ’n eenvoudige manier. Dit moet volgens my basiese vaardighede wees. Hoe om ’n resep te lees, verstaan en maak. Kinders moet leer hoe om begrotings uit te werk en basiese kosse te maak. Witsous, Koekbak en botter versiering. Huishoudkunde kan baie vir jong meisies en selfs seuns beteken.

Reis verder

  • Maak ’n draai in die Eetsalon vir nog resepte: voorgereg, ontbyt, hoofgereg, nagereg
  • Lees nog Kos stories en gesels saam.
  • Treinstories neem jou verder op reis met verhale oor treinritte
  • Maak jouself verder tuis in Amanda Skrywer se Dis net my opinie se sitkamer

Leave a Reply/Los 'n boodskap